ဘင်္ဂလာဒေခ်ျ့မှ ဆန်တန်ချိန် ၂၅၀၀၀ မြန်မာမှ တင်သွင်းမည်

3/7/2010

ဘင်္ဂလာဒေခ်ျ့ နိုင်ငံ အနေဖြင့် ယခုနှစ်တွင် မြန်မာနိုင်ငံမှ ဆန် မက်ထရစ် တန်ချိန် ၂၅၀၀၀ တင်သွင်းသွားမည် ဖြစ်သည်။

ယမန်နေ့က ပြုလုပ်သော ဘင်္ဂလာဒေခ်ျ့ နိုင်ငံ ကက်ဘိနက် ကော်မီတီ အစည်းအဝေးတွင် ဆန် တန်ချိန် ၂၅၀၀၀ ကို မြန်မာမှ ၀ယ်ယူရန် အတည်ပြုလိုက်သည်ဟု သတင်း ရရှိသည်။

ဆန်တတန်ကို အမေရိကန် ဒေါ်လာ ၃၉၅ ဖြင့် ၀ယ်ယူမည် ဖြစ်ပြီး စင်္ကာပူ အခြေစိုက် Indo-Sino Trade Pte ကုမ္ပဏီက မြန်မာ့ဆန်ကို တင်ပို့ရန် ကန်ထရိုက်ရသွားကြောင်း သိရသည်။

ယခုနှစ်အတွင်း မြန်မာနိုင်ငံတွင် ဆန်အထွက်ကောင်းခဲ့သော်လည်း စပါးဈေးမရသဖြင့် တောင်သူလယ်သမားများ အခက်ကြုံနေရသည်ဟု သိရသည်။

ကျောက်ဖြူမြို့နယ်မှ လယ်သမား တဦးက ယခုနှစ်တွင် စပါး အထွက်ကောင်းခဲ့သော်လည်း ဆန်စပါး ဈေး မကောင်းသည့် အပြင် ရောင်းချရန် ဈေးကွက်လည်း မရှ်ိသဖြင့် တောင်သူလယ်သမား အများစုမှာ အဆင်မပြေ ဖြစ်နေရကြောင်း နိရဉ္စရာသို့ ပြောကြားခဲ့သည်။

ယခုကဲ့သို့ ဘင်္ဂလာဒေခ်ျ့မှ ဆန်တန်ချိန် ၂၅၀၀၀ ၀ယ်ယူမည် သတင်းကို ကြိုဆိုကြောင်း ရခိုင်ဆန်ကုန်သည် အသင်းမှ တာဝန်ရှိသူ တဦးက ပြောကြားပြီး ရခိုင်ထွက် ဆန်များကို တင်ပို့ခွင့် ရမည်ဟု မျှော်လင့်ကြောင်း သူက ပြောကြားသည်။

ရခိုင်တွင် ဆန်စပါးဈေး မကောင်းသဖြင့် တချို့တောင်သူ လယ်သမားများ အနေဖြင့် မော်တော်ဘုတ်များဖြင့် ပင်လယ်ပြင်ကို ဖြတ်ကာ ဘင်္ဂလာဒေခ်ျ့ကို တင်ပို့ ရောင်းချ နေကြသည်ဟု သိရသည်။