မဟာမုနိ ဗုဒ္ဓဝိဟာရ ကျောင်းကိစ္စ ပြည်တွင်း နိုင်ငံရေး ပါတီ တခုမှ သဘောထားထုတ်ပြန်
8/9/2010
မင်းဆက်ခိုင်
---------------
ရမ္မာဝတီ အရှင် ပညာစာရ ဖမ်းဆီး လူဝတ်လဲ ခံရပြီးနောက် ရခိုင်ရှေးဟောင်း ယဉ်ကျေးမူ အမွေအနှစ်များ သိမ်းဆည်းခံရမူနှင့် ကလေးငယ်များကို နယ်ဝေး ပြောင်းရွှေ့မူများနှင့် ပတ်သက်ပြီး များမကြာမှီကမှ နိုင်ငံရေး ပါတီ တခု အဖြစ် အသိအမှတ် ပြုခံထားရသော RNDP မှ ကျေညာချက် တစောင်ကို သြဂတ်စ်လ ၉ ရက်နေ့တွင် ထုတ်ပြန် လိုက်သည်။

သဘောထားထုတ်ပြန်ရခြင်းနှင့် ပတ်သက်ပြီး ရခိုင်တိုင်းရင်းသားများ တိုးတက်ရေးပါတီ RNDP မှ ဦးခိုင်ပြည်စိုးကို မေးမြန်းရာ သူက ယခုကဲ့သို့ ပြောသည်။

“ကျောင်းမှာ ကျန်ရှိလိုက်တဲ့ကလေးတွေ၊ တခြားနေရာတွေကို ခေါ်ဆောင် သွားခံရတဲ့ ကလေးတွေ၊ နောက် စာအုပ် စာပေတွေနဲ့ ပတ်သက်ပြီး အစိုးရက သိမ်းဆည်းသွားတဲ့ကိစ္စကို အဓိက ရည်ရွယ် ပါတယ်။ ဒီကိစ္စကို ဘယ်လို ဆက်လက်ထိမ်းသိန်းမလဲ၊ ဘယ်လို နေရာချ ထားပေးမလဲဆိုတဲ့ အပိုင်းကို ကျနော်တို့ အဓိကထား စဉ်းစားပါတယ်။ နောက်ပြီးတော့ အဲဒီ ကျောင်းမှာ မှီတင်း နေထိုင်နေကြတဲ့ သူတွေဟာ မှီခိုရာမဲ့ ဖြစ်နေကြ ပါတယ်။ အဲဒါတွေကို ကျနော်တို့ စနစ်တကျ ပြန်လည် နေရာ ချပေးနိုင်ဖို့ အတွက် မြို့မိမြို့ဖတွေ ရဟန်းသင်္ဃာတွေနဲ့ တိုင်ပင်ညှိနှိုင်းပြီးတော့ ပြန်လည် လုပ်ပေးသင့်တယ် ဆိုတဲ့ အမြင်မျိုး ရှိနေတဲ့ အတွက် အခုလို ကျနော်တို့ သဘောထားကို ထုတ်ပြန်ရ တာ ဖြစ်ပါတယ်။”

အဆိုပါ သဘောထား ထုတ်ပြန်ချက်ထဲတွင် “ မဟာမုနိ ဗုဒ္ဓဝိဟာရ ကျောင်းတွင် ထားရှိခဲ့သော ရခိုင်သမိုင်းဝင် ပေစာ၊ ကျမ်းစာ၊ ဒင်္ဂါးပြား အစရှိသော ပစ္စည်းများသည် ရခိုင်အမျိုးသားများ မြတ်နိုးတန်ဖိုးထားသော သမိုင်းအမွေအနှစ် ပစ္စည်းများ ဖြစ်သည်နှင့် အညီ ရခိုင် အမျိုးသားများ အစဉ်အမြဲ တန်ဖိုးထား ဂုဏ်ယူလေ့လာ နိုင်ရန် အတွက် အမျိုးသား ဂုဏ်ဆောင်ပစ္စည်းများ အဖြစ် ရခိုင် ဒေသ၌သာလျှင် ဥပဒေနှင့်အညီ ထိန်းသိမ်းစောင့်ရှောင့် ခင်းကျင်းပြသနိုင်ရမည်ဟု ကျွန်ုပ်တို့ အခိုင်အမာယုံကြည်ပါသည်။” ဟု ဖေါ်ပြထားသည်။

၎င်းအပြင် ထုတ်ပြန်ချက်ထဲတွင် “ဘုန်းတော်ကြီးကျောင်း အရိပ်အာဝါသ အောက်တွင် ခိုလှုံခဲ့ကြသော ကျောင်း သားလူငယ်၊ ကလေးသူငယ်များ အနေဖြင့် မိမိတို့ နေထိုင်ရာ ဇာတိပတ်ဝန်ကျင်းမှ ဝေးကွာသော နေရာသို့ ခရီးဝေးသွားလာရခြင်းများကြောင့် နာဖျား မကျန်းဖြစ်ရခြင်း၊ စိတ်ပိုင်းဆိုင်ရာ အားငယ် စိုးရွံ့မှုများ ခံစားရနိုင်ဖွယ် ရှိခြင်းတို့ အပေါ် စိုးရိမ် မကင်း ဖြစ်ကြသူများ လာရောက်တင်ပြ အကြံပြုကြသကဲ့သို့ မိမိတို့လည်း ပြည်သူများနှင့် ထပ်တူ စိုးရိမ် ပူပန်မှုရှိပါသည်” ဟု ဖေါ်ပြထားသည်။

ရမ္မာဝတီ အရှင် ဦးပညာစာရအား ဇူလိုင်လ ၂၇ ရက်နေ့က အာဏာပိုင်များ မှ ဖမ်းဆီး ခေါ်ဆောင်သွားခဲ့ပြီး ကျောင်း၌ထားရှိသော သမိုင်းဝင် ပစ္စည်းများ၊ စာပေကျမ်းဂန်များ၊ ရွှေဒင်္ဂါး ငွေဒင်္ဂါးများနှင့် အဖိုးတန်ပစ္စည်း မြောက်များစွာ ကို သိမ်းဆည်းသွားခဲ့သည်။

ထိုနောက် ယခုလ ၅ရက်နေ့က ကျောင်း၌ကျန်ရှိခဲ့သည့် ကလေးများထဲမှ ၉၀ကျော်ကို မကွေးတိုင်းနှင့် မန္တလေးတိုင်းသို့ အာဏာပိုင်များမှ ခေါ်ဆောင် သွားခဲ့သည်။

ဦးခိုင်ပြည်စိုးမှ “အခုက ဒီကလေးတွေ ရပ်ဝေးကို ပါသွားတဲ့ကိစ္စနဲ့ ကျောင်းကို မှီတင်းနေထိုင်ခဲ့တဲ့ သူတွေ အပေါ်မှာ ပြည်သူတွေက စိုးရိမ် မှုတွေဖြစ်နေကြပါတယ်။ ကျောင်းမှာ မှီတင်းနေထိုင်ခဲ့တဲ့ သူတွေ အခုဆို စစ်တွေမြို့မှာ ပြန့်ကျဲ နေကြပါတယ်။ ဒီလိုဖြစ်နေတဲ့ အတွက်ကြောင့် ဒီကိစ္စကို မြို့ခံ လူထုတွေအနေနဲ့ ငါတို့ တခုမှ လုပ်မပေးနိုင် ပါလားဆိုတဲ့ အမြင်တွေ ရှိနေကြပါတယ်။ လုပ်ပေး ချင်ပေမယ့် မလုပ်ပေးနိုင်တဲ့ အနေအထားကို ရောက်ရှိနေကြရပါတယ်။ စစ်တွေမြို့မှာ ရှိတဲ့ မြို့မိမြို့ဖတွေ လူမှုရေး အဖွဲ့အစည်းတွေက တာဝန်ယူ လုပ်ဆောင် ပေးချင်စိတ်တွေ ရှိနေကြတာကို တွေ့နေကြပါတယ်။” ဟု ဆက်ပြောသည်။

ဦးပညာစာရအား တရားစစ်ဆေးစီရင်ရာတွင် ပြည်ထောင်စု မြန်မာနိုင်ငံသား တဦး၏ ရပိုင်ခွင့်များနှင့် အညီ ဥပဒေအရ နည်းလမ်းတကျ ခုခံနိုင်သော အခွင့်အရေး ရရှိသင့်သည်ဟုလည်း RNDP က ကျေညာချက်တွင် ဖေါ်ပြထားသည်။

အဆိုပါ ထုတ်ပြန်ချက်ကို မြို့ခံပြည်သူလူထုအကြား၊ အစိုးရဌာနဆိုင်ရာ ရုံးများတွင်လည်း ဆက်လက် ဖြန့်ဝေသွားမည်ဟု ဦးခိုင်ပြည်စိုးက ပြောသည်။

ဆရာတော်အား ဖမ်းဆီးခြင်း၊ ရခိုင်သမိုင်းဝင်ပစ္စည်းများကို သိမ်းယူခြင်း၊ ကလေးငယ်များအား ဗမာပြည်သို့ ခေါ်ဆောင်ခြင်းများသည် ဥပဒေအရ လုပ်ဆောင်ခြင်းမဟုတ်ပဲ လူမျိုးရေး အရ လုပ်ကြံ ဖန်တီးခြင်းများသာ ဖြစ်သည်ဟု ရခိုင် ပြည်သူလူထုအကြားတွင် ပြောဆိုနေကြကြောင်း သတင်း ရရှိသည်။

ရှစ်လေးလုံးနေ့ နှင့် ၁၃ သြဂတ်စ် ဆန်ပြဿနာနေ့ အခမ်းနား RWU မှ ကျင်းပ
8/10/2010
ထွန်းထွန်းနှင့် စံလင်း
-----------------------
ရခိုင်အမျိုးသမီး အစည်းအရုံး RWU မှ ၂၂ နှစ်မြောက် ရှစ်လေးလုံး အရေးတော်ပုံနေ့နှင့် ၄၃ နှစ် မြောက် စစ်တွေ ဆန်ပြဿနာနေ့ အခမ်းအနားများကို ဘင်္ဂလာဒေခ်ျ့- မြန်မာနယ်စပ်တွင် သြတ်စ်လ ၈ ရက်နေ့က တပြိုင်တည်း ကျင်းပ ပြုလုပ်ခဲ့သည်။

ယခုကဲ့သို့ သမိုင်းဝင် အရေးတော်ပုံကြီး နှစ်ခုကို တပြိုင်တည်း ကျင်းပရခြင်းနှင့် ပတ်သက်ပြီး RWU ဥက္ကဌ ဒေါ်စောမြရာဇာလင်းက ယခုကဲ့သို့ ပြောသည်။

“ဒီသမိုင်းဝင် အရေးတော်ပုံကြီးနှစ်ရပ်ဟာ တိုက်တိုက်ဆိုင်ဆိုင် သြဂတ်စ်လ အတွင်းမှာ ဖြစ်ပွားခဲ့တဲ့ အတွက် တချိန်တည်း တနေရာတည်းမှာ တခါတည်း ကျင်းပရတာ ဖြစ်ပါတယ်။ ရှစ်လေးလုံး အရေးတော်ပုံနေ့ကို ပြည်သူတွေ သိစေချင်သလို စစ်တွေ ဆန်ပြဿနာနေ့ကိုလည်း ပြည်သူတွေကို သိစေလိုပါတယ်။ ဖြစ်ရပ် နှစ်ခုလုံးကို တပြိုင်တည်း ကျင်းပရတဲ့ အတွက် ပြည်သူတွေကိုရော နောင်အနာဂတ် မျိုးဆက်သစ်တွေပါ အဲဒီ အရေးအခင်းတွေနဲ့ ပတ်သက်ပြီး ပိုမိုပြီး သိရှိနားလည် သဘောပေါက် နိုင်လိမ့်မယ်လို့လည်း မျှော်လင့်ပါတယ်။”

အခမ်းအနားတွင် သဘာပတိအဖြစ် ဖလောင်းချိတ် တောကျောင်းဆရာတော် ဦးစန္ဒာဝရမှ ဆောင်ရွက်သည်။ အခမ်းအနားတွင် ဦးစန္ဒာဝရက ယခုကဲ့သို့ အဖွင့်မိန့်ခွန်းကို မိန်းကြားသည်။

“မြန်မာနိုင်ငံမှာ ၈ လေးလုံးနေ့ဟာ မြန်မာပြည်သူအားလုံး အတွက် မမေ့နိုင်၊ မမေ့အပ်တဲ့ နေ့ဖြစ်သလို ရခိုင်ပြည်မှာလည်း ဆန်ပြသနာနေ့ဟာ ရခိုင်ပြည်သူတွေ အတွက် မမေ့အပ် မမေ့ထိုက်တဲ့ နေ့တွေ ဖြစ်ပါတယ်။ အဲဒီလို နေ့ထူး နေ့မြတ်တွေကို ယခုလိုကျင်းပခြင်းဟာ နောက်လာ နောင်သားတွေကို မေ့မသွားအောင် ပြန်လည်နိုးဆွပေးသလိုဖြစ်လည်း ဖြစ်ပါတယ်။ ဒါကြောင့် အခုလို ထူးခြားတဲ့နေ့တွေကို နှစ်စဉ်နှစ်တိုင်း ကျင်းပသင့်ပါတယ်။ ခုလို ကျင်းပတဲ့ အတွက်လည်း အဲဒီ အရေးတော်ပုံတွေ အတွင်းမှာ ကျဆုံးသွားတဲ့ ရဟန်းရှင်လူ ပြည်သူတွေကို ဂုဏ်ပြု ဦးညွှတ် လေးစားရာလည်း ရောက်ပါတယ်”ဟု ပြောသည်။

အခမ်းအနားကျင်းပရခြင်း ရည်ရွယ်ချက်နှင့်ပတ်သက်ပြီး ရခိုင်အမျိုးသမီး အစည်းရုံး ဥက္ကဌ ဒေါ်မြရာဇာလင်းက ယခုကဲ့သို့ ပြောသည်။

“အဓိက ရည်ရွယ်ချက်ကတော့ ဒီကနေ့ ရင်ဆိုင်ကြုံတွေ့ နေရတဲ့ နိုင်ငံရေး ပြဿနာတွေ အပေါ်မှာ ၈၈၈၈ မျိုးဆက်သစ်တွေနဲ့ ရင်းရင်းနှီးနှီး တွေ့ဆုံ ဆွေးနွေး အဖြေရှာနိုင်ဖို့၊ ၈၈၈၈ လှုပ်ရှားမှု အကြောင်းတွေကို ပြည်တွင်းပြည်မှာ ရှိနေကြတဲ့ သူတွေကို သတင်းမီဒီယာတွေက တဆင့် သိစေဖို့၊ နောက်ထက် ၈၈၈၈ မျိုးဆက်သစ် လူငယ်တွေလို အနာဂတ်မှာ မျိုးဆက်သစ်တွေ ရှင်သန် ပေါက်ဖွား လာစေဖို့နဲ့ ၈၈ အသိစိတ်ဓါတ်တွေ ကိန်းအောင်းလာပြီး မျိုးဆက်သစ်လူငယ်တွေမှာ စိတ်ဓါတ်ရေးရာ အရ အပြောင်းအလဲတွေ ဖြစ်ပေါ်လာနိုင်ဖို့ ရည်ရွယ်ချက်တွေနဲ့ ကျင်းပ ရတာဖြစ်ပါတယ်”ဟု ပြောသည်။

အခမ်းနားသို့ RWU ၊ AASYC နှင့် အခြားအဖွဲ့စည်းများ၊ တသီးပုဂ္ဂလ ပုဂ္ဂိုလ်များ စုစုပေါင်း အင်အား ၅၀ ခန့် တက်ရောက်ခဲ့သည်။

အခမ်းနားမှာ တက်ရောက်လာသူများက ရှစ်လေးလုံး အရေးတော်ပုံအကြောင်း၊နှင့် စစ်တွေ ဆန်ပြဿနာ ဖြစ်ပေါ်လာရသော အကြောင်းအရာများကို အပြန်အလှန် ဆွေးနွေးကြပြီး နေ့လည် ၁ နာရီမှ စတင်ခဲ့သော အခမ်းအနားကို ညနေ ၄နာရီတွင် အောင်မြင်စွာ အဆုံးသတ်ခဲ့ကြသည်