ပြည်ပရောက် မြန်မာတို့၏ဆု ကျော်သူ ရရှိ
ဝါးရှီးဖော Monday, April 26, 2010
မြန်မာနိုင်ငံ အတွင်း လူမှုရေး လုပ်ကိုင်သူများ အတွက် ပြည်ပရောက် မြန်မာပြည်သားတို့ ပထမဆုံး အကြိမ် ၀ိုင်းဝန်း ချီးမြှင့်သည့် “ပြည်သူ့ ဂုဏ်ရည်ဆု” ကို ရုပ်ရှင် သရုပ်ဆောင် ဦးကျော်သူက ရရှိသွားသည်။

နိုင်ငံတကာရောက် မြန်မာတို့ အများဆုံး အဆို တင်သွင်းကြသည့် လူမှုရေး လုပ်ငန်း လုပ်ဆောင်သူ ၅ ဦးကို အင်တာနက်မှ တဆင့် ရွေးချယ်ရာတွင် ဦးကျော်သူက မဲအများဆုံး ရရှိခဲ့ကြောင်း စနေနေ့က အမေရိကန် ပြည်ထောင်စု လော့စ်အိန်ဂျလိစ်မြို့တွင် ပြုလုပ်သည့် ဆုပေးပွဲ အခမ်းအနားတွင် ဆုရွေးချယ်ရေး အဖွဲ့က ကြေညာလိုက်သည်။

ဒုက္ခရောက်နေသူများကို ကူညီမှု အတွက် ရသည့်ဆု ဖြစ်သောကြောင့် အလွန် အထွတ်အမြတ် ထားသည်ဟု ဦးကျော်သူက ဧရာဝတီသို့ ပြောသည်။

“ပြည်တွင်းမှာ ရှိတဲ့ မြန်မာတွေရဲ့ လူမှုရေး စွမ်းဆောင်ချက်တွေကို ပြည်ပရောက် မြန်မာတွေက အခုလို မြန်မာ ပီသစွာနဲ့ အားပေး ချီးမြှင့်တာဟာ ကျနော်တို့ အတွက် အဖိုး မဖြတ်နိုင်တဲ့ အားဆေး တခွက် ဖြစ်တယ်” ဟု နာရေးကူညီမှု အသင်းကို တည်ထောင်ပြီး ၁၀ နှစ်ကြာ လူမှုရေး လုပ်ငန်းများ လုပ်ကိုင်နေသည့် ဦးကျော်သူက ပြောသည်။

ဦးကျော်သူနှင့်အတူ နာရေးကူညီမှု အသင်းကို ဦးဆောင်နေသည့် ဇနီးဖြစ်သူ ဒေါ်ရွှေဇီးကွက်ကလည်း ယခု ရရှိသည့် လူမှုရေးဆုကို ရုပ်ရှင်ထူးချွန်ဆုထက် ပိုမို တန်ဖိုးထားမိသည်ဟု ဆိုသည်။

“သူ အကယ်ဒမီ ရခဲ့တာတွေ အတွက် ကျမ အဲဒီလောက် ဂုဏ် မယူခဲ့မိဘူး။ ဒီဟာ ကျတော့ ကျမ ကိုယ်တိုင်လည်း ပါဝင်တယ်၊ အသင်းသူ အသင်းသား အားလုံးရဲ့ ကိုယ်စား ကိုကျော်သူ ရတဲ့ အတွက် ကျမ ဂုဏ်ယူပါတယ်” ဟု ဒေါ်ရွှေဇီးကွက်က ဧရာဝတီကို ပြောသည်။

ဂုဏ်ပြုဆုနှင့်အတူ ငွေသားဆု အမေရိကန် ဒေါ်လာ ၇၀၀၀ လည်း ပါဝင်သည်ဟု သိရသည်။ ဆန်ခါတင်အဆင့်အထိ ပါဝင်ခဲ့သူ အခြား ၄ ဦးအတွက်လည်း ဂုဏ်ပြုဆုများနှင့် ငွေသားဆု ဒေါ်လာ ၁၀၀၀ စီ ချီးမြှင့်ခဲ့သည်။ ထို ပုဂ္ဂိုလ် ၄ ဦးမှာ နာဂစ်ဒေသ ကယ်ဆယ် ကူညီရေး လုပ်ငန်းများ လုပ်ကိုင်ခဲ့ကြသော လူရွှင်တော် ဇာဂနာ၊ သီတဂူ ဆရာတော် ဦးဉာဏိသရ၊ HIV/AIDS ဝေဒနာရှင်များကို ကူညီသူ မဖြူဖြူသင်း၊ ပဲခူးမြို့မှ ဥပဒေ အကျိုးဆောင် ဦးအေးမြင့်တို့ ဖြစ်သည်။

ဆုများ ပေးအပ်နိုင်ရန် အမေရိကန် မြို့ကြီး ၁၄ မြို့နှင့် နိုင်ငံတကာမှ မြန်မာတို့က ကူညီ လှူဒါန်းခဲ့ကြသည်ဟု ဆိုသည်။

ယခုနှစ် ပြည်သူ့ ဂုဏ်ရည်ဆုအတွက် နိုင်ငံပေါင်း ၅၀ ကျော်တွင် ရောက်ရှိနေသူ မြန်မာပြည်သားတို့က ယခု လဆန်းပိုင်းမှ စတင်ပြီး ဆန္ဒမဲပေါင်း ၂ သိန်းကျော် ပေးပြီး ရွေးချယ်ခဲ့ခြင်း ဖြစ်ကြောင်း၊ မဲအများဆုံး ပေးသူများမှာ အမေရိကန် နှင့် စင်္ကာပူတွင် ရောက်နေသော မြန်မာပြည်သားများဖြစ်ကြောင်း သိရသည်။

ဆုကို လူမှုရေး လုပ်ငန်းများ လုပ်ဆောင် ရာတွင် ကိုယ်ကျိုးစွန့် အနစ်နာခံမှု၊ ကျယ်ပြန့် ထိရောက် အောင်မြင်စွာ ဆောင်ရွက်နိုင်မှု၊ နိုင်ငံသားများနှင့် လူ့ဘောင်လောက အတွက် စံပြဖြစ်မှု တို့ကို အခြေခံပြီး ရွေးချယ်ခဲ့ကြခြင်း ဖြစ်သည်ဟု သိရသည်။ လာမည့် နှစ်များတွင်လည်း “ပြည်သူ့ ဂုဏ်ရည်ဆု” ကို ချီးမြှင့်ဦးမည်ဟု စီစဉ်သူများက ပြောသည်။

NLD အလံနှင့် ဆိုင်းဘုတ် ဖြုတ်လိမ့်မည်မဟုတ်
ခိုင်သွယ် Monday, April 26, 2010

အမျိုးသားဒီမိုကရေစီ အဖွဲ့ချုပ် (NLD) အနေနှင့် လာမည့် မေလ ၆ ရက်နေ့တွင် ပါတီမှတ်ပုံတင် သက်တမ်း ကုန်ဆုံးမည် ဖြစ်သော်လည်း ဆိုင်းဘုတ်ဖြုတ်ခြင်း၊ အလံဖြုတ်ချခြင်းတို့ ပြုလုပ်မည် မဟုတ်ကြောင်း ယနေ့ ကျင်းပသည့် ဗဟိုအလုပ်အမှုဆောင် အစည်းအဝေး ဆုံးဖြတ်ချက်ဖြင့် ထုတ်ပြန်ကြေညာလိုက်သည်။

“ပြည်သူလူထု အကျိုးပြုတဲ့ လူမှုရေးလုပ်ငန်းတွေကိုပဲ ကျနော်တို့ NLD က ဆက်လက် ဆောင်ရွက်သွားကြမှာ ဖြစ်ပါတယ်” ဟု ပြန်ကြားရေးအဖွဲ့မှ ဦးအုန်းကြိုင်က မီဒီယာများသို့ ပြောဆိုလိုက် သည်။

လက်ရှိ အနေအထားအရ NLD အနေနှင့် စစ်အစိုးရအတည်ပြုခဲ့သည့် အခြေခံဥပဒေကို လက်မခံနိုင်သည့်အတွက် ပါတီမှတ်ပုံတင်ခြင်း ပြုလုပ်မည် မဟုတ်သကဲ့သို့ နိုင်ငံရေးလုပ်ငန်းများကိုလည်း လုံးဝ ရပ်ဆိုင်း ထားရမည့် အခြေအနေ ဖြစ်နေကြောင်း၊ သို့ရာတွင် ဆိုင်းဘုတ်မဖြုတ်၊ အလံမချခြင်းမှာ NLD အနေဖြင့် ဆက်လက်ပြီး ပြည်သူလူထုအပေါ် စေတနာ ထားရှိနေဆဲ၊ ရှင်သန်နေဆဲဖြစ်သည်ဟု ပြသနေခြင်းဖြစ်ကြောင်း၊ လုပ်ငန်းတာဝန်များ မပြီးဆုံးသေးဟု မှတ်ယူနေသည်ကို ပြသနေခြင်းဖြစ်ကြောင်း ဦးအုန်းကြိုင်က ပြောဆိုသည်။

အမျိုးသားဒီမိုကရေစီအဖွဲ့ချုပ်ဝင်များ မြန်မာနှစ်သစ်ကူး အတာသင်္ကြန်ကာလ အထိမ်းအမှတ်အဖြစ် ဒေါ်အောင်ဆန်းစုကြည်ဓာတ်ပုံကို ရေပက်ဖျန်းစဉ် (ဓာတ်ပုံ - AP)
“ကျနော်တို့ ခေါင်းဆောင်တွေရဲ့ ဆန္ဒကတော့ အားလုံးကို ငြိမ်းငြိမ်းချမ်းချမ်းပဲ ဖြစ်စေချင်တယ်” ဟု သူက ဆက်ပြောသည်။

NLD ဗဟို အမျိုးသမီးအဖွဲ့ကလည်း မေလ ၄ ရက်နေ့အထိ ရုံးရှေ့တွင် ဆွမ်း ဆက်လက် ကပ်လှူသွားမည်ဖြစ်ပြီး မေလ ၇ ရက်နေ့ နောက်ပိုင်း အစီအစဉ်များကို မေလ ၄ ရက်နေ့တွင် ပြုလုပ်မည့် အစည်းအဝေးဆုံးဖြတ်ချက်အပြီး ထုတ်ပြန်ကြေညာ သွားမည် ဖြစ်ကြောင်း NLD အမျိုးသမီးအဖွဲ့ခေါင်းဆောင် တဦးဖြစ်သူ ဒေါက်တာမေ၀င်းမြင့်က ဆိုသည်။

လူမှုအထောက်အကူပြု အဖွဲ့မှ လုပ်ငန်းများကိုမူ မေလ ၇ ရက်နေ့ နောက်ပိုင်းတွင်လည်း ဆက်လက် လုပ်ဆောင်သွားမည် ဖြစ်ကြောင်း သိရသည်။

နယ်စပ် ခြံစည်းရိုးကာရံမူ အပေါ် မြန်မာဘက်က အိမ်နီးချင်းနိုင်ငံကို တရားဝင် ရှင်းလင်း

4/24/2010

မြန်မာ- ဘင်္ဂလာဒေခ်ျ့ နယ်စပ် တလျှောက်တွင် မြန်မာဘက်က ကာရံနေသော ခြံစည်းရိုးမှာ နှစ်နိုင်ငံ အကျိုးအတွက်သာ ဖြစ်ကြောင်း မြန်မာဘက်က လွန်ခဲ့သော သောကြာနေ့က တရားဝင် ရှင်းလင်း တင်ပြခဲ့သည်။

ဘင်္ဂလာဒေခ်ျ့ နိုင်ငံဆိုင်ရာ မြန်မာ့ သံအမတ် ဦးဖေသန်းဦးက ဘင်္ဂလာဒေခ်ျ့ နိုင်ငံ နိုင်ငံခြားရေး ၀န်ကြီးဌာနသို့ သွားရောက်ပြီး အဆို ရှင်းလင်းမူကို တရားဝင် ပထမဆုံး အကြိမ်အဖြစ် တင်ပြ ပြုလုပ်ခဲ့ခြင်း ဖြစ်သည်။

သံအမတ် ဦးဖေသန်းဦးက ယခု မောင်တောမြို့နယ် တောင်ပိုင်းနှင့် မြောက်ပိုင်း နယ်မြေ တလျှောက် ကာရံနေသော ခြံစည်းရိုးမှာ နယ်စပ်မျဉ်းမှ ကိုက် ၅၀ အကွာအဝေးတွင် တည်ဆောက်နေခြင်းဖြစ်ပြီး တချို့ နေရာများတွင် ကိုက် ၁၀၀၀ အကွာအဝေးတွင် တည်ဆောက်နေခြင်း ဖြစ်ကြောင်း ပြောဆိုသည်ဟု သိရသည်။

၎င်းပြင် ဦးဖေသန်းဦးက ခြံစည်းရိုးကာရံမူမှာ မြန်မာနိုင်ငံတည်း အတွက် အကျိုး မဟုတ်ဘဲ ကျွန်တော်တို့၏ မ်ိတ်ဆွေ နိုင်ငံ ဖြစ်သော ဘင်္ဂလာဒေခ်ျ့ အတွက်လည်း အကျိုးရှိကြောင်း ပြောဆိုသည်ဟု ဆိုသည်။

ဦးဖေသန်းဦးမှ ယခုခြံစည်းရိုးကာရံနေမူမှာ စစ်ရေးအတွက် ဘန်ကာများ တည်ဆောက်နေခြင်း မဟုတ်ကြောင်းနှင့် မူးယစ် မှောင်ခို လုပ်ငန်း အပါအ၀င် တခြား မှောင်ခို လုပ်ငန်းများကို နှိမ်နှင်းရန်နှင့် လူမှောင်ခို ကုန်ကူးမူကို တားဆီးလို၍ ဖြစ်ပါကြောင်း ပြောကြားခဲ့သည်ဟု သိရသည်။

ဦးဖေသန်းဦး၏ ရှင်းလင်းပြောကြားချက်ကို နိုင်ငံခြားရေးရာ ၀န်ကြီး Dr Hasan Mahmud ကိုရှင်းလင်း ပြောကြားခဲ့ခြင်း ဖြစ်သည်။

Dr Hasan Mahmud ကမူ ဦးဖေသန်းဦး တင်ပြသော အဆိုပါ ခြံစည်းရိုးကိစ္စနှင့် ပတ်သက်ပြီး တစုံတရာ မှတ်ချက်ချပြောကြားခြင်း မရှိသော်လည်း လွန်ခဲ့သော တနင်္လာနေ့က သတင်းထောက်များနှင့် တွေ့ဆုံစဉ် နယ်စပ် စီရိုမျဉ်းမှ ကိုက် ၁၀၀ အကွာ မြန်မာဘက်တွင် ခြံစည်းရိုးကာရံသည်ဟု ဆိုလျှင် မိမိတို့ အနေဖြင့် တစုံတရာ ပြောကြားလိုခြင်း မရှိကြောင်း ပြောကြားခဲ့သည်။

ဘင်္ဂလာဒေခ်ျ့ ဘက်မှ အဆိုပါ ခြံစည်းရိုးကာရံနေမူနှင့် ပတ်သက်ပြီး အငြင်းပွားမူများ မြှင့်တက်လာပြီးနောက် တရားဝင် ရှင်းလင်းပေး မြန်မာဘက်ကို တနင်္လာနေ့က တောင်းဆိုရာမှ ဦးဖေသန်းဦးက သောကြာနေ့တွင် တရားဝင် လာရောက် ရှင်းလင်းခြင်း ဖြစ်ကြောင်း သိရသည်။

မြန်မာနှင့် ဘင်္ဂလာဒေခ်ျ့ နယ်စပ်မှာ မိုင်ပေါင်း ၁၆၈ မိုင် အရှည်ရှိပြီး နတ်မြစ်ဝမှ စတင်ကာ မောင်တောမြို့နယ် မြောက်ပိုင်းထိ မိုင် ၄၀ ခြံစည်းရိုးကာရံမူကို ပြုလုပ်နေရာ ယခုအခါ ပြီးစီးလုနီးပြီ ဖြစ်သည်ဟု သိရသည်။

မြန်မာ စစ်အစိုးရသည် ယခုအခါ မောင်တောနှင့် ဘူးသီးတောင်အကြားရှိ နယ်စပ်တလျှောက်တွင်လည်း ခြံစည်းရိုး စတင်ကာရံရန် စီစဉ်နေပြီး အဆိုပါ ဒေသသို့ စစ်သား အများအပြား ရောက်ရှိနေကြောင်း နယ်စပ်မှ လာသော သတင်းများအရ သိရသည်။

ဝ ဒေသ တိုက်ပွဲဖြစ်မည်ကို ဒေသခံများ စိုးရိမ်
ရန်ပိုင် Monday, April 26, 2010
စစ်အစိုးရနှင့် ဝ ပြည်သွေးစည်းညီညွတ်ရေး တပ်မတော် (UWSA) တို့အကြား နယ်ခြားစောင့်တပ် ဖွဲ့စည်းရေးကိစ္စ တင်းမာမှုများကြောင့် ရှမ်းပြည်တောင်ပိုင်း မိုင်းဆတ်၊ ကျိုင်းတုံနှင့် တာချီလိတ်မြို့များရှိ ဒေသခံပြည်သူများမှာ စားနပ်ရိက္ခာ စုဆောင်းနေကြပြီး ကုန်ဈေးနှုန်းများလည်း မြင့်တက်လာကြောင်း သိရသည်။

တာချီလိတ်မြို့ ရဲတပ်ဖွဲ့မှ တာဝန်ခံတဦးက “၂၈ရက်နေ့နောက်ပိုင်း တောင်ပိုင်း ၀ပြည်နယ်ကို သွားမယ့်လမ်းတွေ၊ ဂိတ်တွေ ပိတ်တော့မယ်ဆိုတဲ့ သတင်းတွေကြောင့် လူတွေက စားသောက်ကုန်တွေ ၀ယ်နေကြတယ်” ဟု ဆိုသည်။

တိုက်ပွဲများ ဖြစ်ပွားမည်ဟူသည့် ထင်မြင်ချက် များကြောင့် ထိုင်းမြန်မာနယ်စပ် ပုံပါကျင်နှင့် မိုင်းတုံဒေသများတွင် ဒေသခံ ပြည်သူများ စားနပ်ရိက္ခာ စုဆောင်းနေသည့်အပြင် ထိုင်းနိုင်ငံသို့ ထွက်ပြေးရန် ပြင်ဆင်မှုများ ရှိကြောင်း အဆိုပါ ရဲအရာရှိက ပြောသည်။

ပြီးခဲ့သည့် ရက်ပိုင်းမှစတင်၍ မိုင်းတုံမြို့နယ်အတွင်းရှိ ဟွေအော့၊ နမ့်ယွန်း နှင့် ပုံပါကျင်မြို့ အနီးတ၀ိုက်ရှိ ၀ ကျေးရွာများမှ ဒေသခံ များသည် ထိုင်းနိုင်ငံ ချင်းတောင်းမြို့နယ် မိန်းလအုပ်စု မျက်နှာချင်းဆိုင်ရှိ နောင်ဝှန်းကျေးရွာသို့ ရွှေ့ပြောင်းလာကြောင်း သျှမ်း သံတော်ဆင့် သတင်းစဉ်မှ အယ်ဒီတာ ဦးစိန်ကြည်က ဆိုသည်။

စစ်အစိုးရ၏ တင့်ကားနှင့် သံချပ်ကာကားများကိုလည်း တာချီလိတ်၊ မိုင်းတုံ၊ မိုင်းဆတ်၊ ကျိုင်းတုံ ဒေသများတွင် တွေ့ရှိ လာရသည့် အတွက် ဒေသခံများ ပိုမို စိုးရိမ်လာကြောင်း၊ ထို့ကြောင့် စားနပ်ရိက္ခာများ ပိုမို စုဆောင်းလာခြင်းဖြစ်ကြောင်း တာချီလိတ် မြို့ခံ ကုန်သည် တဦးက ပြောသည်။

“၀ နဲ့ မြန်မာစစ်တပ် တိုက်ပွဲဖြစ်မယ်ဆိုတဲ့ ကြောက်စိတ်နဲ့ လူတွေက ဈေးတွေ တအား ၀ယ်ထားတယ်” ဟု ၎င်းကဆိုသည်။

ဒေသခံများအနေဖြင့် နှစ်ဘက်ဖြစ်ပွားမည့် တိုက်ပွဲများထက် တိုက်ပွဲဖြစ်လျှင် ကုန်ဈေးနှုန်း တက်လာမည်ကို ပိုမို ကြောက်ရွံ့ကြောင်း၊ လွန်ခဲ့သည့် နှစ်လခန့်ကလည်း ဒေသခံပြည်သူများသည် စားနပ်ရိက္ခာများကို ၀ယ်ယူစုဆောင်းကြ သေးကြောင်း အဆိုပါ မြို့ခံက ဆက်လက်ပြောဆိုသည်။

တာချီလိတ်မြို့ ဝန်းကျင်ဒေသတွင် ကြက်သွန်နီဈေးနှုန်းမှာ ပြီးခဲ့သည့် တပတ်အတွင်းက တကီလိုလျှင် ၂၁ ဘတ် (ကျပ် ၆၀၀ ကျော်) မှ ယခုရက်ပိုင်းတွင် ၂၇ ဘတ် (ကျပ် ၈၀၀ ကျော်)၊ ကုလားပဲတကီလို လျှင် ၂၅ ဘတ် (ကျပ် ၇၅၀ ဝန်းကျင်) မှ ၄၀ ဘတ် (ကျပ် ၁၂၀၀ ဝန်းကျင်) အထိ ဈေးနှုန်းမြင့်တက်သွားကြောင်း၊ ဆန်မှာ ၀ယ်ယူစုဆောင်းမှု များပြားသော်လည်း ထိုင်းနိုင်ငံမှ ပုံမှန် ၀င်ရောက်နေသည့် အတွက် ဈေးမတက်သေးကြောင်း သိရသည်။

ပြီးခဲ့သည့် ဧပြီလ ၂၃ ရက်နေ့ ညနေပိုင်းကလည်း မိုင်းဆတ်မြို့အရှေ့ဘက် မိုင်းတုန်းတောင်ကြော ဒေသတွင်လည်းကောင်း၊ ၂၄ ရက်နေ့က ထိုင်းနိုင်ငံ ဖန်မြို့ မျက်နှာချင်းဆိုင် မိုင်းဆတ်မြို့တောင်ဘက် လွယ်ဖာဟုံဘုတ် တောင်ကြောတွင် စစ်အစိုးရတပ်များနှင့် ၀ တပ်ဖွဲ့များကြား တိုက်ပွဲငယ်များ ဖြစ်ပွားခဲ့သည်ဟု သျှမ်းသံတော်ဆင့် သတင်းစဉ်တွင် ရေးသားထားသည်။

စစ်အစိုးရက နယ်ခြားစောင့် တပ်ဖွဲ့စည်းရေးနှင့် ပတ်သက်၍ အပစ်အခတ်ရပ် အဖွဲ့များကို လာမည့် ဧပြီလ ၂၈ ရက်နေ့ နောက်ဆုံးထား အကြောင်းပြန်ရန်နှင့် အကြောင်းမပြန်ပါက မတရားအသင်း အဖြစ် ကြေညာမည်ဟု သတိပေးထားသည်။